九月立法會選舉，火藥味十足，因為北京方面，聲音響亮、愛國論不絕於耳，馬丁李又剛好喺呢個時間去美國，發馬丁路德金嘅夢、民主夢、回鄉夢喎！唉，有一隻馬叫做「故鄉夢」，屬希斯馬房，聽講來價甚高，希望爭今季打吡。前星期六，左丁山買第二口孖T，頭關有「叻蝦王」，輕易過關，次關以「故鄉夢」做膽，點知跑第四飲恨，孖T中咗五隻，左丁山一睇派彩，十八萬八千，真係幾乎喊到冇聲。馬丁李嘅回鄉夢大概與左丁山嘅「故鄉夢」差唔多—即係soclose,yetsofaraway！
馬丁路德金（MartinLutherKing,Jr.）喺一九六三年八月二十八日在華盛頓林肯紀念堂演講，佢篇講詞IhaveaDream成為世界經典，楊鐵樑爵士與陶傑教英文都引用過。高祀仁話馬丁李未瞓醒，發白日夢，已好畀馬丁一個藉口講佢自己有一個夢。
同樣有一個夢嘅係譚偉豪，快譯通大股東是也，佢想做立法會議員。資訊科技界功能組別嘅立法會議員係民主黨嘅單仲偕，四年前以大比數取勝。今年就唔同咯，商界對民主派睇唔順眼，要諗辦法阻止民主派在立法會取得過半數議席，其中一個招數就係爭取功能團體議席，於是譚偉豪乘時而出，要挑戰單仲偕。據電腦界人士講，譚偉豪已經周圍搵人支持，搵業內人士加入資訊科技界功能組別嘅乜會物會，成為會員兼選民。譚偉豪係大老闆，單仲偕係打工仔，究竟呢個界別如何選擇，有趣之至，單仲偕如果以為可以輕鬆連任，就係發緊夢咯。