上周鷹美（2368）因為獲得裕元集團（551）入股，令股價急升，但裕元本身亦唔弱，上周五升5.45%，收24.20元，接近52周高位。
經紀黃話，裕元股價上升，據講唔係因為受入股鷹美消息刺激，而係班芬佬同埋大行分析員覺得，裕元過去大半年冇乜點升過，落後大市頗多，所以有翻炒價值。
裕元舊年被納入恒生指數成份股之前，股價已經錄得好大升幅，正如好多恒指成份股新貴一樣，加入咗之後，股價通常表現牛皮，裕元亦唔例外，除此之外，生產波鞋的原材料如PVC價格上漲，影響裕元邊際利潤，亦係影響股價表現原因之一。
今次裕元入股生產Nike波衫嘅鷹美，隨着鷹美復牌股價急升，裕元不單帳面獲利，而且芬佬睇好裕元今次入股，可為擴展生產波衫衣帶來協同作用，加上過去6個月，恒指升咗好多，但裕元股價停滯不前，所以家陣想借機翻炒。
經紀黃又話，雖然已經有外資行調高裕元目標價，但為穩陣計，都係待回落時再買。
小啟：上周六「股壇瀏覽器」一文中，提及「下周一」中聯系統（757）配售股份可以沽得，其所指的下周一實為3月15日。
慕容小初