好似上年皇馬訪港時，睇到香港球迷心花怒放，向客軍喝晒采呢啲咁嘅事真係好少見；但前晚阿仙奴喺足總盃八強賽就搞到主隊老樸球迷如癡如醉，重企起身向兵工廠嘅球員致敬㖭。
話說阿仙奴打完上半場已經領前三粒，最後贏夠五比一；之但係當梅開二度嘅亨利同龍格保，以及韋拉一個接住一個被調離場時，竟然受到老樸球迷嘅站立拍掌致敬，搞到我求大俠以為身在高貝利球場一樣。
咁重唔止，老樸領隊哈利列納更加大讚阿仙奴係歐洲最佳球隊，甚至可能係世上最佳，又話曼聯同車路士已經唔係阿仙奴嗰皮……係唔係誇張咗啲呢？阿仙奴確係當弗，但唔好當皇馬、AC、祖記同拜仁呢幾隊波死㗎。邊個係高手之中嘅高手，我求大俠認為，喺歐冠盃交手至見真章！
歐冠盃係歐洲球會最重視嘅大賽，但近屆總有一、兩隊俾呢個盃所累，搞到喺本土聯賽走晒樣。上屆有德甲利華古遜，前屆就有法甲南特同西甲馬略卡；喺今屆，相信最受影響就係切爾達。佢哋目前喺西甲排第十八，重喺前日聯賽俾第十九嘅愛斯賓奴大炒五比一，護級前途麻麻。
效力德甲不來梅嘅巴西前鋒艾列頓，本來會喺星期一簽約，正式入籍卡塔爾。不過，據聞德足總向國際足協強烈抗議，搞到艾列頓未必可轉國籍。我求大俠就覺得德足總小器咗啲，艾列頓早前向佢哋送秋波想轉德籍就請人食檸檬，𠵱家人哋想轉第二個國籍又唔畀，咁算點先？
為備戰月底作客香港嘅世界盃外圍賽，國足上周六作客廣州日之泉踢友賽，竟然輸一比二，冇晒「菲士」。我求大俠二月中睇國足險勝客軍科威特已經覺得唔對路，點知今次重搞成咁。另外，由於敍利亞嚟唔到中國踢友賽，國足改咗本月中同緬甸踢，咁改法似乎對國足又唔係好事噃。
前車仔衰仔摩利士，日前俾列斯放棄，我求大俠心諗，係咪呢排李斯特城球員單涉嫌強姦案影響關係，列斯對呢類事件都好敏感？摩利士曾經涉嫌強姦同毆打，個檔案花晒，列斯𠵱家重搵緊買家，如果有呢類人重喺球隊，確係一大障礙，所以摩利士今次可能衰喺自己手上嘞。