新車速報:<br>新版SuzukiWagonR+人氣小車王

新車速報:
新版SuzukiWagonR+人氣小車王

踏入2004年,香港市況向好,連帶市民消費意欲亦大增,故此唔少汽車代理商都睇準時機,以最快速度引入旗下最新車款;好似日本鈴木汽車嘅代理咁,最近就引入咗經過改良嘅全新2004年版本WagonR+抵港,以求在小型汽車市場上分一杯羹。

記者:鄭達基
攝影:陳偉強

鈴木WagonR車系自於1993年9月推出以來,喺日本本土嘅累積銷量經已超過二百萬部;能創出如此佳績,相信除與新車賣相富年輕活力感、車廂鋪排靈活多變,同埋性能表現出色有關;至於新抵港嘅2004年版WagonR+,就更加入有不少新配備,從而令其吸引力大增,有興趣嘅朋友,不妨睇完今日呢個介紹之後,去陳列室睇睇部車喎。

新尾燈夠突出
或者大家會話,呢部屬2004年新版嘅鈴木WagonR+,與早前發售嘅型號有何分別呢?雖然筆者於試車當日,到代理處取車前亦有相同嘅疑問,但當接觸到部車嘅真身後,所有疑團隨即解開。
2004年版本新車依舊以方匣子造型示人,同時亦保留有原來嘅15吋跑車合金胎軨、全車原廠包圍及尾定翼外,廠方更特別為其換裝上跑車化嘅白底尾燈編排,響上述多項配件嘅襯托下,一份小跑車形象油然而生;另外,向橫伸展嘅門邊鏡,更可給予駕駛者較前來得廣闊嘅後視範圍。

新版變化重點

■前排乘客席下方設有雜物匣外,將椅背覆摺下來又可以充當餐桌。

■車廂鋪排吸引,新增設備更誘人。

■承托力高嘅前後兩排座椅,坐得妥貼舒適。

■可作前後獨立移動嘅後排座椅,能予人更高乘坐舒適度。

■中控台除有齊原廠冷氣及全新大面板音響外,另有隱蔽式杯座。

可移動後座更愜意
至於車廂方面,新車不但保留車系原有空間闊落,同埋鋪排靈活多變嘅個性,其實內裏亦有不少變動,例如改用經過重新編排,配合銀色框邊及銀底白光嘅跑車表板,就連中控台上嘅一套音響組合,亦改換成可播放MP3嘅大面板高級音響。
另一方面,前後兩排座椅皆用上新物料製造,坐落妥貼舒適又有高手觸感外,後排座椅可作前後滑動嘅幅度比以前更大,同時又有一觸式座椅收摺放平裝置,從而讓你運用車上每寸空間,來得方便容易。

■附有銀色框邊嘅新表板,有型又易讀。

■新款跑車化白尾燈編排,閱讀清晰容易。

■四輪15吋跑車合金胎軨組合,行車循迹性因而增加。

■跑車尾喉襯以泵把連整流器,好有小跑車氣息。

引擎配搭慳油好力
新車仍以一台編號M13A嘅1.3公升直4DOHC引擎作動力心臟,佢不但有充裕嘅動力輸出,匹配一套4前速軚自動波,對應付日常行車需要絕無問題,而且重好啱筆者呢種喜愛「一個D波走天涯」嘅駕駛者㗎!歐式底盤結構配合一套高性能輪胎組合,路面循迹表現不俗,而高效能煞車系統,亦有助增強制動表現。

■遇有需要時將椅背覆摺放平,能增加尾廂載物容量。

■一套4前速軚式自動波組合,轉檔順滑又直接。

記者評WagonR+:新車型得多
新近抵港嘅2004年版鈴木WagonR+,響新款尾燈襯托下,賣相明顯要來得好有跑車氣息;而略作改動嘅車廂鋪排及新加入多項設備,亦對提高乘坐愜意度,增添不少分數呢!

鈴木WagonR+Profile
引擎:1328cc直4DOHC
馬力:89ps/6000rpm
扭力:12.0kgm/3500rpm
傳動:4前速自動波
懸掛:(前)麥花臣支柱(後)拖曳臂
制動:(前)透氣碟(後)鼓式(ABS)
輪胎:165/55R15BridgestonePotenzaRE88
尺碼:3575×1600×1695mm
軸距:2360mm
新車售價:$119,900
車輛提供:香島汽車(23320091)