以前係首席大法官嘅楊鐵樑退休後熱心公益係人都知，鍾意義務教小朋友後生仔學英文，亦都係街知巷聞；今次楊官一次過做善事兼教後生仔學英文，全力支持港台同網上拍賣網站ebay合辦嘅「楊鐵樑教授英語」慈善拍賣，經過一星期嘅投標，總共有十位網友出價最高，成功投得楊官嘅英語課程。楊官噚日親自教授佢哋嘅英文求職信嘅寫作技巧。
嗰十個後生仔其實都唔簡單，個個都係本地大學生，一個鐘頭嘅英語班，個個講英文都係嘞嘞聲，全程同楊官用英文溝通。佢哋又備足課，每人都作定封求職信，等楊官過目，有錯即改，氣氛好融洽。八方相信第日呢班大學生畢業後，拎住呢封求職信，搵工肯定無往而不利。
講番今次拍賣，錢就唔算多，話晒個個都係學生哥，最高拍賣價嗰位仁兄仁姐，都係講緊五百六十幾蚊啫，其他由一百蚊至三百蚊不等，有得學英文又可以做善事，真係何樂而不為！今次拍賣籌得總數幾千蚊，所有善款都會捐畀香港聯合國兒童基金。正所謂多多益善，小小無拘，大家都係表達一番善心，楊官梗係唔介意善款多少啦。
（圖）楊鐵樑呢個慈善英語班，參加者都係大學生，本身英文已經有番咁上下。 港台提供圖片
傳真︰2623-9278
電郵︰