中銀香港分行總經理劉金寶，雖然愛國愛港，可惜亦同時愛埋上海暴發富商周正毅夫婦。
胡溫出手郁老江上海幫，周正毅斷正，劉金寶亦因為貸款去向不明而慘遭祖國鎖押，現時仍然係下落不明。
馬會前一排貼出通告，公開向劉金寶追討拖欠嘅會費，一時成為笑談，不過，中環好多名流收藏家，最近就時興收集二○○○年版中銀所發嘅五百蚊鈔。
點解？因為呢張五百蚊紙，有劉金寶好威水咁下令「在香港見票即付」嘅珍貴簽名。
劉金寶一旦被正式起訴、審判，照祖國反貪嘅決心睇，若然冇人保，有可能面臨打毒針嘅極刑，到時，港幣現鈔就會造就銀行簽發人戲劇性「名垂千古」嘅歷史紀錄，所以呢隻五百蚊紙好有升值嘅潛力，值得現時掃貨收藏。
話時話，香港「回歸祖國」短短七年，已經有兩大鈔票簽字人因醜聞慘淡收場，簽發十蚊「花蟹」嘅梁錦松被迫辭職，簽五百蚊嘅指鼻哥認頭人又搞成咁。中國人民當家作主，真係不同凡響。
傳真︰2623-9278
電郵︰