近年銳意在港大展拳腳嘅萬事得汽車，繼於去年引入全新RX-8、MPV及Mazda3等車系而大受歡迎後，佢哋最近又有新搞作，就係響有九龍「汽車一條街」之稱嘅尖沙嘴柯士甸道，設立一間全新嘅陳列室，方便車迷睇車買車咁話。
新Showroom裝修與一般陳列室有頗大分別，好有CyberFeel之餘，空間亦好闊落，除可容納多達六部新車外，車與車之間重有充裕嘅地方，讓準買家能從容地睇清楚心儀車款嘅每一處；然而，代理方面為隆重其事，日前更特別為新Showroom舉行咗一個開幕Party，當日除一眾汽車傳媒到賀外，而且重有不少嘉賓出席㖭！另外，幾位美豔動人嘅外籍Showgirls（左圖），更與一眾賓客拍照留念，場面可謂十分熱鬧。