今個星期碟場又轉靜，雞雞哋做個煲碟人，都會整隻《金雞2》消遣下；濃濃嘅香港本土風味，一貫嘅笑中有淚手法，同阿金一齊見證香港大時代轉變，可能會引起大家好多有關03年嘅回憶。
記者：朱崇德
新戲上畫3個月再出DVD，好似已經成為香港電影一種生存模式，講真《金雞2》已經算出得遲，相對於同期12月上畫嘅《無間道3：終極無間》，已經差唔多慢咗成個月！
第一集《金雞》玩懷舊，今次第二集就調轉過來，大玩未來Feel，一開場已經係2046年嘅聖誕節，好似有心潤吓王家衛套《2046》拍極都唔完；82歲嘅阿金在俯瞰維多利亞「河」的太平山山頂，撞正失戀青年盧力士（杜汶澤飾）濫用精神科藥物「忘情丸」；手法同上一集曾志偉嘅失業搶劫匪一樣，一面勸解，一面道出自己的「做雞」經歷，過去的經歷可能好痛苦，但人絕不應或忘，傳遞一種正面的做人訊息。
幸好劇到中段，有一段阿金同表哥馮仁坤嘅愛情史，主要交代阿金上一集嘅「觀音送子」是從何而來；學友做呢個表哥真係演技非常老練，嗰種為錢乜都得嘅「狗面」，正係大家近年大家為求有份工，唔想被炒魷嘅一幅嘴臉；值得大家深思！
一開場已經係2003年嘅農曆新年車公誕，而且以勁爆笑嘅手法，講阿金點樣誤攞全部上上籤嘅造馬籤筒，令何生為港人求得難以忘懷的下籤，為2003年港人的噩夢揭開序幕；最痛苦者，真係莫如4月到臨的SARS！阿金莫名其妙地在元宵節，接到一個死於馬上風嫖客周老闆，而且重接手咗佢嘅茶餐廳生意，結果當然係慘淡經營啦！而間場出現嘅口罩醫生黎明，亦令人回憶起好多SARS烈士事迹，令人痛惜不已！
可能第一集《金雞》條橋真係去得好盡，由魚蛋檔、夜總會舞小姐、骨場妹去到一樓一鳳，見證香港賣淫業興衰之歷史，亦講述了由香港魚翅撈飯嘅火紅年代，到最瞓街嘅日子，相對今次只講2003年一年事迹，大時代及血肉感真係有點被第一集比下去！
爆笑鄭中基MV
Bonus都預咗冇乜嘢睇，可以一看是鄭中基嘅《為肥婆隻雞甩晒毛》MV，歌詞抵死，而且用晒明星相面具，扮香港名影星都搵阿金玩一夜情，都幾爆笑！
新碟冇乜大片出，結果係令《非常小特務之3D立體出擊》連續蟬聯二星期頭位！《金雞2》、《愛情差錯腳》同《極地重生》都算係新片，去碟情況都差不多，真係有啲不分軒輊，暫時都冇乜大片公布下星期推出，相信大家餓碟情況要捱多一個星期。
第1位《非常小特務之3D立體出擊》
第2位《金雞2》
第3位《愛情差錯腳》
第4位《極地重生》
第5位《無可挽回》
電話:23326326
地址：旺角奶路臣街6E德發商場地庫B4舖