我大口羅拉同好多電視迷一樣，每次一有美國人氣電視劇推出美版DVD，就即刻買返屋企狂煲，不過今次總算俾明珠台威番次，《24》第三輯都未出DVD，佢哋已經搶閘喺下個星期日（十四號）播放第一集。
最新一輯《24》嘅劇情亦十分緊張，由基夫修打蘭（KieferSutherland）飾演嘅反恐小組頭子阿積，今次面對更艱巨嘅任務，因為恐怖分子要脅美國政府釋放一名大毒梟，否則會喺洛杉磯發放一種致命嘅生化細菌，而佢就要喺二十四小時內搞掂班恐怖分子。
今次嘅故事發生喺上一輯嘅三年之後，睇過上一輯嘅觀眾一定好緊張臨尾暈低咗嘅美國總統有冇事，今輯一開場個總統就好精神咁出現，不過佢身體似乎未好得晒，令觀眾非常擔心。而主角阿積今集着住西裝戴黑超現身，睇嚟好似型仔咗，但因上一輯阿積受過苛刻嘅肉體虐待後有後遺症，性情變得好暴躁，重染埋毒癮。
今輯另一個意外之處，就係阿積嘅愛女Kim入咗反恐小組負責電腦工作，明顯大個女咗好多嘅佢，重會同老竇嘅下屬發展戀情㖭！