羅大佑將全副精神獻給音樂，連婚姻也因音樂而犧牲。九八年他跟拍拖多年的女友李烈結婚，但只維持了一年半便離婚收場。
羅大佑說：「原本我三十歲嘅時候同自己講，話我係唔會結婚，因為我唔鍾意小朋友喊嘅時候好吵耳，我做音樂，好怕吵耳嘅聲，但九八年左右，我同女朋友結婚，但結咗一年半左右就離婚。」
羅大佑表示因與前妻的生活習慣未能協調而離婚，他說：「我瞓覺嘅時候要聽住音樂，但有啲人聽住音樂瞓唔到，咁兩個人喺埋一張床，你話會點？有時靈感到，諗起隻歌就會彈，通常一隻歌未寫好之前，係一定唔好聽，會嘈到人囉！」
他續說：「音樂係我個仔，我希望呢個仔可以長命啲，如果長命過我，我已經覺得好抵㗎啦！」
跟羅大佑做訪問，話題總不離開政治，如早前他公然炮轟毛澤東是王八蛋，他不但不擔心被秋後算帳，還嫌自己未鬧夠，他說：「我唔驚，我北京重有間公司喺度，我喺北京都敢講！我覺得我冇鬧錯人，毛澤東搞鬥爭，搞到中國變咗乜嘢？我覺得毛澤東絕對唔愛國，愛國要睇結果㗎嘛！」
