自從嚟咗隻專打貪污大老虎嘅「無比敵」之後，成個細價股市場好似洗完太平地咁，靜過鬼，冇晒各方好友嘅報料熱線，不過成交仍然冇點縮到，平均每日仍然有接近170億元成交額，而且仍有唔少股仔打入十大上升榜，升幅都有1成以上。睇嚟呢隻「無比敵」算得係幾友善，並無好似當年嗰隻「細價股」怪獸咁亂咬人。
上個星期滙控（005）同恒生（011）公布業績後，個市就好似玩跳樓機咁直衝谷底。不過，唔少散戶好似聽到無形的號召，用金錢築成血肉長城，抵禦大戶源源不絕嘅滙恒空倉。按市場智慧嚟講，散戶蜂擁接貨嘅時候，通常隻股都係未跌夠，所以伏勝覺得，呢兩大銀行股重未係時候反彈。睇怕滙控要番落去120蚊、恒生要見番100蚊，走勢先至會有轉機。
另外，喺內地人大開會期間，市場又再憧憬會有唔少利好國企股嘅政策出台，於是有部份資金又轉番去炒吓啲國企股。伏勝睇新聞，見到有關國內農業改革嘅政策，溫總理話要搞好國內農業，重實行多項利好農業發展嘅措施。伏勝於是就問個負責睇國企股嘅大行分析員朋友，睇吓喺推動農業發展嘅國策下有乜股票可以諗諗。點知一開口，大家腦海中即時浮現一部拖拉機出嚟，冇錯嘞，我哋都睇好隻第一拖拉機（038）。聽呢位朋友講，佢哋之前亦推介過一拖，因為國內農改其中一個項目，就係希望可以在短期內將農業改為機械化，提高生產效率，對於一拖嚟講可以話係一個好好嘅炒賣藉口，再加埋上星期溫總嗰番堅決嘅言論，隻股應有作為，短線目標聽講可以見到3蚊左右。
伏勝