呢兩日民主派之間爭相八卦嘅花邊新聞，唔係「曾人大」連邊個訪美都搞錯，而係前日喺電視睇到李卓人着住件藍色黑間西裝，成個「西瓜波」咁出席美聽證會，一見阿人呢身「西瓜波」Look，香港成為時裝中心嘅美夢差啲可以話即刻粉碎咁滯，有人重好抵死咁話，唔該代表紡織界嘅梁劉柔芬關注吓，挽救香港時裝界嘅聲譽。
講到民主黨今次搵涂謹申陪馬丁去美國，有民主派中人講笑話係民主派擔心馬丁講大咗，所以專登搵阿涂昅住馬丁，不過聽聞阿涂今次失職，因為馬丁唔肯同阿涂一間房，趕咗佢同李卓人一間房。
點解？原來阿涂瞓覺鼻鼾響過雷，馬丁嘈到瞓唔到，惟有趕佢走。
傳真︰2623-9278
電郵︰