成班老友行埋，講到地產，有人眉飛色舞，此乃工程N。工程N話：「邊個係香港樓神？」所謂樓神，當然唔係李嘉誠、李兆基、郭氏兄弟，佢哋已經係地產界玉皇大帝級數，有神仙服侍，睇慣報紙地產版嘅，當然會想起一啲「賣樓之神」，於是有人講趙國雄、雷霆、周國賢、李智康……工程N微微嘴笑：「統統都唔係，偉大領導人鄧小平話過，無論黑貓白貓，捉到老鼠嘅就係好貓。正是成王敗寇，捉唔到老鼠嘅就係病貓喇。登登登凳，樓神就係林奮強呀！」
林奮強有好多fans，舊年十月，新城財經台主辦「投資KingKing騷」，林奮強講地產，一位女觀眾大聲嗌：「林奮強，我好信你㗎，你講乜我就買乜？」於是林奮強話：「新地、信置、恒隆三隻。」呢位女fans如果當時照跟，已經賺到笑！
但係點解工程N都係林奮強fans呢？工程N話：「我重早聽喇，舊年八月中，佢到新城財經台接受訪問，大聲疾呼話樓價必升，當時我心諗，係唔係大隻講呀，冇理會，但到咗十月，我住宅附近，左右隔籬，真係樓價猛升喎，再猶疑咗一輪，卒之喺聖誕前兩個星期，飛身買入寶翠園一個高層向海單位，嘻嘻嘻……」
於是大家逼供，問佢賺咗幾多，工程N話：「多就冇，前日有人向我開價，賺三百零啦！」嘩，唔夠四個月，賺咗兩年人工，唔㩒佢請食魚翅撈飯都唔得，佢於是請我哋去九龍城打鼓嶺道，一路食一路拜林奮強呢位樓神！