梅艷芳和葉德嫻是羅大佑最敬佩的女歌手，可惜阿梅已離他而去，葉德嫻則因《赤子》一曲而與他反目。羅大佑解釋葉德嫻其實是不滿他忘記送贈一部CD機給她作為報酬，此事亦令他內疚不已。
今年七月便年屆五十的羅大佑，人生佔了三十年時間也是獻給音樂，在這漫長的音樂旅途中，梅艷芳和葉德嫻（Deanie）是他最欣賞及佩服的女歌手。日前羅大佑在他位於灣仔的寫字樓內，大談對二人的感受。
羅大佑說：「阿梅份人好直，佢除咗遲到之外，我從來冇聽人講過佢嘅壞話，記得我哋合作《似是故人來》呢首歌嘅時候，原本下晝兩點錄音，但佢四點半至出現，不過佢用咗差不多四十五分鐘就錄完，佢真係值得等！今次演唱會，我準備咗一個好特別嘅環節向阿梅致敬。」
早前有報道指羅大佑因欺騙Deanie唱了《赤子》一曲而令二人反目，葉德嫻接受訪問時亦表示，羅大佑只叫她一起研究《赤》曲，完全不知此歌會出街，羅大佑對此說：「其實當日我打畀Deanie，話有首電影主題曲想佢唱，佢話：『如果我唱就要收一百萬，𠵱家我乜都唔要，你送番部CDwalkman畀我就得啦！』當日佢係知道首歌會出街㗎，嗰晚林夕都喺度，不過係我錯，我唔記得送番部CDwalkman畀佢。」
羅大佑續說：「直至四年前，我去林夕屋企，一聽到《赤子》首歌就知糟糕，我好似應承咗Deanie送部CDwalkman畀佢，我唔記得咗，於是第二日我即刻走去西洋菜街買咗部DVD機，託林夕送畀Deanie，因為跟住我要趕返台灣，之後我冇打電話同佢道歉囉！」
羅大佑表示剛與Deanie通電話，更為當年的錯失道歉，他說：「咁啱之前監製想搵Deanie做我演唱會嘉賓，佢打畀我話唔做，我同Deanie講話唔緊要，我當年話過送部CD機畀你，但我唔記得咗，我想同你道歉。」他邊說邊將手電的通話紀錄讓記者看。
羅大佑表示，雖然葉德嫻未能擔任他本月在紅館舉行的演唱會嘉賓，但她卻答應會捧場。羅大佑說：「Deanie份人好有原則，樣樣嘢清清楚楚，唔會呃人，佢愈有原則我就愈鍾意佢，雖然好多人覺得佢好難搞，但音樂其實就係一樣好難搞嘅嘢啦！」問他若Deanie再唱歌，他會否幫手？他即說：「免費同佢作曲都得！」
採訪：戴彩煥 攝影：陳烱威
