許志安前晚錄影無綫節目《勁歌金曲》，他自爆在無綫做一個騷，只得二千元左右的酬勞，當他得悉梁思浩做一個騷有三千元時，即表現得頗為驚訝。不過安仔成功爭取到為無綫擔任奧運客席主持，效法李克勤主持體育節目。
許志安、Cookies及2R等歌手及組合，前晚到將軍澳電視廣播城錄影《勁歌金曲》，安仔接受訪問時，自爆在無綫做一個騷，酬勞只得二千元。
安仔說：「其實我好有興趣做奧運主持，等公司幫我傾吓先。」問他做騷酬勞如何，安仔毫不考慮即說：「一、二千蚊左右囉，我十年八年冇加人工呀，賺錢喺出面賺啦，無綫對我咁好。」問安仔可知他的騷錢比梁思浩的三千元還少？他即說：「佢咁貴咩？可能佢又做主持又拍劇先唔同呢，我哋唱歌嘅錢唔同。」問安仔最熟悉甚麼運動，他說：「足球籃球都識少少。」
其實安仔已落實在無綫轉播奧運期間擔任客席主持，他稍後便會出席記者會公布詳情，不知安仔是否想效法李克勤，憑主持體育節目而大受歡迎呢？
近日有報道指安仔借鄭秀文的關係，欲向關錦鵬𢱑撈，對此他說：「我只係一日同王海鋒私下食飯，撞見關錦鵬，都冇傾工作，佢嘅戲亦唔係你同佢熟就有得拍，要角色啱先得㗎，十畫都未有一撇。」
提到有消息指環球與正東合併後，李克勤將成為一哥，而安仔則由一哥變「阿四」，他聞言後即笑說：「四哥幾好，我都想似謝賢，做八哥都唔錯，嗰種狗好多人錫。」
此外，2R前晚穿上短裙現身，兩人在節目中要坐上高櫈與主持閒聊，兩姊妹惟恐走光，全程用手按着裙邊，其後當同樣穿短裙的Cookies成員Theresa出場時，2R的Rosanne即提醒她小心走光。
採訪：卓美娟
攝影：陳烱威
