經濟發展及勞工局局長葉澍堃噚日鬼咁高興同記者講，踏入三月，每日勞工處收到嘅空缺都維持喺一千個嘅水平，勢頭好好，二月份私人機構嘅空缺有成二萬三千幾個，較一月同舊年同期都大增，港人有嘢做，葉局長最高興，佢梗係希望利用CEPA嘅契機，同勞資雙方傾掂數，創造更多新職位。
唐唐下周講首份預算案，葉局長話佢唔知情，但都好想唐唐減紅酒稅，唔使俾新加坡搶晒啲紅酒客。雖則唐唐同葉局長好運，但係老左日日炮轟，怕唔怕嚇走晒啲米飯班主？葉澍堃話滙豐大班講咗，佢冇補充喎。坐得喺度做局長，梗係愛國啦。葉澍堃噚日雖然喉嚨痛，但係工照返，提起翡翠拉麵又開新店，局長猛話啲麫正，重將舊年喺工展會大手筆買下嘅蝦子麵送畀記者，真多謝晒。
傳真︰2623-9278
電郵︰