上個星期五寫「廣告失縱」，講《蘋果日報》冇晒啲地產廣告之疑惑。見報後，收到一個英文短訊（SMS），譯成中文就係「食得鹹魚抵得渴，點會怕大戶杯葛。」睇完為之會心微笑，唔少大戶係美國人、加拿大人、英國人、澳紐人，佢哋為愛國而唔喺《蘋果》登廣告，唔知可唔可以去各國領事館投訴佢哋歧視呢？當係笑話可也。
好在天無絕人之路。ACNielsen（尼爾森媒介研究）發表○四年一月份香港廣告總支出（adspend），（未計算折扣），係三十二億元，比○二年一月增加14%，顯示廣告復甦得好快。各行各業之中賣廣告最多嘅係護膚產品、保健品、食肆會所、旅遊、超市、電影?娛樂、地產、唱片、百貨及流動電話。其中地產與超市佔二億零三百萬元，佔總數6%，冇晒都冇相干，只要得到其他廣告就得啦。廣告媒體之中，電視台最惡，佔咗十五億五千九百萬，報紙雜誌佔十四億六千五百萬，電台佔七千三百萬，其他佔一億一千三百萬。
照計《蘋果》係暢銷報紙，啲護膚產品、保健品、食肆、電影、旅遊、唱片、電話等廣告，除非與自己生意搗蛋，想害死老闆，否則冇理由唔擺落《蘋果》，因為媒介公司嘅正常操作守則係睇數字，包括銷路、讀者人數與讀者背景，如果佢哋依數據辦事，《蘋果》點會唔掂呀？除非銷路跌，讀者人數減少啦。所以短訊講得冇錯，即使大戶杯葛，我哋啲寫稿佬，唔怕冇稿費收！