大笨象滙控（005）繼續受壓，大市靠國內電訊股支撐，中移動（941）升1.3%，聯通（762）升2.6%，最終令恒指微升3點，收報13454，成交就縮至155.92億元。
TOMOnline（8282）同中芯國際（981）都傳出招股反應異常理想，其中TOMOnline公開發售傳錄得百倍超購。TOM集團（8001）股價全日升8.4%至2.575元，成交金額高達2.17億元，上實（363）股價則冇升跌，成交6802萬元。不過，據黑客所講，TOMOnline承銷團努力向外界唱好，四圍叫人捧場，催谷認購額。若情況屬實，阿虎有啲擔心TOMOnline貨源會派得太散。相反，中芯獲有實力資金垂青，就算超購倍數唔多，上市後亦可能更容易炒上。
中聯系統（757）噚日股東會一致通過收購和記固網業務，正式歸入長和系旗下，隻股亦開始有番鑊氣，成交增加至1690萬元，股價亦升4%至0.97元。有口痕友話，超人唔衰得，中聯至少要見番一蚊七。長和系同中電（002）上次合共配售嘅20億股中聯系統，如無意外，下周一可以沽得，口痕友所講係真係假，好快就知。
小小超今次又明益殼王陳國強，電盈（008）將地產項目注入東方燃氣（432）之內，搞到中策（235）勁升26.4%，德祥企業（372）亦升5.2%，保華德祥（498）升1.4%，但錦興（275）則跌1.4%，收3.45元。黑客同阿虎講，如果呢單deal成咗，相信殼王旗下股份重有排升，不過佢諗極唔明，小小超點解要揀燃氣股個殼，而唔揀鍾楚義旗下嘅資本策略（497）呢隻地產殼？
阿虎