關心妍提供日本受訓片段給有線播映，結果觸怒無綫，無綫即時封殺關心妍及其BMA唱片公司旗下歌手。昨日關心妍向無綫公開道歉，更向受牽連的呂方說句「唔好意思」，惟呂方卻說：「唔使客氣，都係多得你啦！」
關心妍早前因提供日本受訓的廣東話片段給有線娛樂新聞台播放，違反無綫歌手合約，無綫決定全線封殺關心妍及其所屬BMA唱片公司旗下歌手，令傅珮嘉和剛加盟BMA的呂方也受牽連。昨日呂方為RoadShow節目擔任主持，並請來關心妍做嘉賓，對於被無綫封殺一事，關心妍直指是公司內部疏忽引起，並即場向無綫道歉。
關心妍說：「公司內部有小小疏忽，我僅代表公司同TVB道歉，對唔住，我知道自己係TVB合約歌手，亦會尊重歌手合約精神，希望TVB網開一面，件事唔好搞到咁大。以後我做嘅嘢會check好多次。今次教訓係一個警惕，日後一定支持合約精神。」今次事件連累到呂方無緣拍攝《勁歌推介》力谷新歌，對此關心妍向呂方說聲「唔好意思」，不過呂方仍滿不是味兒說：「冇連累，唔使客氣喎，都係多得你啦！」
由於呂方非無綫合約歌手，豈非可接受有線訪問？他面有難色指自己國語欠佳，記者提議他講英文，但呂方仍耍手擰頭說：「我怕佢哋啲人唔識聽，我唔想同TVB關係唔好，我今晚都入TVB拍MTV啦，如果有機會見到啲高層咪幫吓口囉！」
問呂方可覺無綫霸道，他說：「吓，我喺TVB出嚟，唔講得，而且我又係新秀出身，拍過好多劇，點可以咁講呀。」關心妍亦不敢批評無綫，她說：「好驚呀，我都係海外新秀出身，將來有機會都會拍劇！」昨日有線亦有派員採訪記者會，但當他們欲拍攝呂方與關心妍訪問時，BMA工作人員即上前阻止。
而無綫高層陳志雲和黃家亮昨日亦會見傳媒，對於關心妍公開道歉，陳志雲未有回應無綫是否接受，只說：「今日唱片公司有send溝通文件畀藝員科，個別事件我哋唔會評論，最緊要重視合約精神，冇合約基礎大家好難合作，傾唔掂咪最多解約，TVB唔會封殺任何人，總之情況嚴重我哋會法律追究，我好多謝佢（關心妍）同佢公司同大家解釋，呢個係一個好嘅溝通。」
問無綫會否擔心其他歌手效法時，陳志雲說：「如果談不攏就解約，咁你去邊個台都得啦，我哋有專責小組跟進，監察所有違約嘅情況，無綫係絕對唔容許任何違約事件繼續發生。」
不少歌手昨日就無綫封殺關心妍事件發表意見，楊千嬅昨日說：「乜有咁嚴重㗎？總之以後所有咪牌遞過嚟，我都講國語先！」容祖兒則說：「我自己做乜訪問都會用國語，以策安全。」
2R昨日出席活動時，仍如常以國語接受有線訪問，2R說：「任何訪問都係公司安排，亦係人哋叫我哋講國語，都唔知係乜台，相信啲歌手都唔會特登，無綫係大台，我哋唔想得罪，呢啲都係公司負責。」
採訪：楊潔雯、卓美娟
攝影：陳烱威、卓美娟
