尖沙嘴明日有大型招聘日，不過，今次唔係地產代理請人，都唔係專為雙失人士而設嘅招聘會，而係由新世界集團有份參與嘅戶外嘉年華式旅遊點，尖沙嘴海濱長廊嘅星光大道員工招聘會。
舉行地點喺正星光大道附近新世界中心，總共會請四十名親善大使同銷售員。
由新世界全資擁有嘅星光大道管理公司，執行董事袁靖罡話，應徵者條件，係「主動、肯學肯做、不怕吃虧，而又充滿笑容」。相信經過舊年經濟極度低迷之後，好多後生仔女，都會有以上嘅條件。
聽講全長四百四十米嘅星光大道，最快下月底開幕，以電影為主題。可以預見除會成為旅遊新熱點之外，附近商場一定得益良多，尤其沿海濱長廊直達嘅新世界中心，更加係如魚得水。
既為沿海增加特式旅遊點，又可以直接增加附近商場人流，有利商舖租戶生意額，遲吓業主傾續租，都聲大啲。真係一家便宜幾家着。
樓價日日升，有業內人士話，個市十足97年咁瘋狂。好似大圍二線屋苑金禧花園，一個四百六十三方呎單位，一名投資者舊年12月用八十二萬買入，今年1月以一百萬賣畀另一投資者，翻新後，早兩日再由第三名投資者以一百二十八萬八接手。計計數，個單位三個月間升值達五成七，最新成交呎價達2782元，雖然創新高，但美聯何良浩話，屋苑個價重係偏低，應該重有上升水位。
利嘉閣又一村分行客戶經理鍾放之，跨區促成五間赤柱富豪海灣洋房，總值二億幾，佣金收入超過四百五十萬，個人穩袋百五萬。
利記董事廖偉強話，近排市旺，平均每間分行嘅營業額都係百萬左右，𠵱家單佢一人首個禮拜嘅收入，已經超越成間分行一個月嘅成績，破晒利記有史以來嘅紀錄。呢位「百萬經紀」入行八年，過去幾年都有唔少威水史，佢阿頭曾令智透露，00年佢幫群策集團售出大埔觀海崇樓4座洋房，套現7500萬。99年又替金朝陽集團以1.5億達成荃灣富華廣場成交。
近呢幾個月，香港豪宅市場俾人炒到火紅火綠，大家睇番好樓市，揸住豪宅一手貨嘅發展商唔係吊高嚟賣，就直情玩封盤。好似赤柱富豪海灣現樓賣到每呎萬三、四蚊，百利保就開紅酒慶祝，放軟手腳唔憂賣。
由大昌發展嘅舂坎角環角徑33號，聽佢哋高層講，雖然已經有唔少基金同投資者想成個項目買，或者最少都買幾間咁同佢斟，但因為重係樓花，個市又上緊，項目又只得十四間三千多呎嘅獨立花園大屋，呢種類型喺港島南區已經賣少見少，真係唔憂賣，所以公司都冇意思應承。
中原中國喺內地搞咗好多年嘅代理業務，近幾年開始有回報，除深圳分公司早前入咗福布斯嘅全國十大卓越僱主，北京分公司又俾當地萬房網評為03年北京十大最佳業績代理之冠，可謂喜事重重。
睇番佢哋舊年業績，負責策劃及銷售嘅項目達二十一個，生意額超過二十八億元人民幣，比第二名多差唔多兩億銀。北京分公司原來2002年嗰陣已經躍居第二名，今次更上層樓㖭。聽中原中國黎總講，呢間分公司都經過多番改革同換血，先至有今日嘅成績，得來不易。
蘭西
電郵地址：