香港影壇盛事「第二十三屆香港電影金像獎頒獎典禮」將於下月四號喺香港文化中心舉行，當晚除咗影帝、影后及「最佳電影」幾個大獎最令人注目外，司儀陣容、表演嘉賓同頒獎嘉賓亦都係頒獎禮嘅焦點。
馮仁昭聽聞金像獎大會今年搵咗黃子華做司儀，早前舉行嘅奧斯卡金像獎頒獎典禮開場時，大會司儀比利基斯度（BillyCrystal）預先拍咗段搞笑片段，化身各提名影片嘅角色，重博到盡玩全裸，由於呢條橋好鬼煞食，所以香港電影金像獎亦打算食住上，將子華key入去《無間道II》、《忘不了》、《大隻佬》同《PTU》等幾條片度搞吓鬼。
大會重諗住玩「七星伴月」，由七位份量十足嘅靚女輪流夥拍子華出場，例如梁詠琪、Twins、楊千嬅同楊采妮等，子華咁有豔福真係恨死馮仁昭！
四人組合Cookies噚日到尖沙嘴為一間化妝品公司剪綵，吸引大批市民圍觀，幾個學生哥fans重着住校服到場。Cookies話有勸告過歌迷唔好逃學去捧佢哋場，Theresa話：「我諗佢哋都係趁住lunchhour先出嚟捧場，如果俾我哋知道佢哋逃學，我哋一定會重罰。」
蔡楓華早前指控新力唱片喺八九年單方面撤銷合約，未經佢授權及同意仍繼續賣佢嘅唱片，重一直冇畀版權費佢。蔡楓華上年入稟高等法院，控告新力唱片，追討至少三百五十萬蚊版權費，案件噚日喺高院進行內庭聆訊，蔡楓華現身法院，但拒絕作任何回應。新力唱片中文唱片部總經理王凱文就話一切已交畀律師處理。
案件編號：HCA1955/03
鬢咗成頭辮仔嘅張惠妹早前喺內地拍攝一個飲品廣告，收約三百八十萬港幣酬勞，阿妹喺廣告度着住對暴走鞋，重畀歌迷狂追，佢拍完之後好鍾意對暴走鞋，阿妹覺得着呢對鞋行路快啲，之後佢重着住對鞋到機場，坐飛機返台灣，原來阿妹都幾貪玩噃！
譚詠麟（阿倫）、陳百祥、曾志偉、彭健新同任達華等，前晚坐夜機從老沃返港，佢哋個個都曬到一身古銅色返嚟，大家異口同聲話呢次行程好好玩，阿倫話：「我哋玩得好開心，除咗打golf之外，重玩咗好多水上活動。」難怪佢哋曬到黑黝黝啦，搞到我馮仁昭都好想去度吓假！
車淑梅同蔡浩樑日前訪問「港版RickyMartin」孔慶翔（WilliamHung），蔡浩樑因公開笑孔慶翔樣貌而俾聽眾投訴，我馮仁昭都唔幫佢！噚日車淑梅喺節目度話蔡浩樑要噴口腔清新劑同埋要洗牙，又話主持要有唔同風格至有特色。噚日影視及娛樂視務處又接多一宗投訴，令到投訴總共達十八宗。
