金衛醫療（8180）在配股傳聞下仍然愈升愈高，成交亦愈見活躍，似乎係抽水行動正在進行中嘅格局，但一隻創業板股喺家陣咁嘅時勢，究竟批唔批得成？真係好難講。
不過，金衛醫療噚日嘅買賣盤，統統都係外資大行，睇落係威係勢。隻股以全日高位3.60元收市，大升6.7%，創下52周新高，成交股數317萬股，金額1125萬元。
經紀陳話，講開配股，近日頗為高調嘅招商迪辰（632），表示會喺中國大搞倉儲、配送物流及導航系統硬件，而佢阿媽又話會分拆軟件業務在美國上市，真係動作多多。
不過，市場傳聞有人四出聯絡證券界人士，好似話想批股集資，集資額重話過億銀咁多。
招商迪辰嘅前身係啟祥，變身至今，業績已經大有改善，但如果真係要抽咁多水，睇嚟重要花多些少心思包裝，及搵到有力人士幫手。
招商迪辰噚日微升1.45％，收0.14元，但成交好細，只得百零萬銀，少過金衛醫療好多，重未見有大動作。
慕容小初