擁有盜冒外國名牌嘅刑事犯罪紀錄嘅人大常委曾憲梓，一向大膽敢言，喺北京開會，當被記者問及中國領導人胡錦濤獲得李柱銘喺美國國會高度評價時，曾憲梓一副老人癡呆相，鼻哥窿郁一郁，黑口黑面，不屑咁罵咗一句：「貓哭老鼠！」
嘩，李柱銘係貓，不過胡錦濤同溫家寶就係老鼠？貓哭老鼠，係當隻老鼠死咗之後先至哭嘅，曾憲梓不但形容胡溫係老鼠，重詛咒胡溫快啲死，果然係暢所欲言，開人大胡溫新政嘅言論自由新風氣喎！
好多高官同人大政協私底下議論紛紛，爭相解讀曾憲梓呢一句「老鼠論」嘅指示。有人認為黑曾個腎唔係操作得咁好，腎上腺分泌過盛，亦有啲不願透露姓名嘅港區人大話，曾憲梓健康好好，一啲都唔懵，佢咁講，幕後有老江一派勢力指使，想同胡溫對抗。無論係點，曾憲梓為人咁坦率，相信喺美國政府心目中亦大大加分。
但係話時話，曾憲梓唔知係咪病壞咗，噚日連司徒華同馬丁都分唔開，叫范太紀律處理埋冇去美國嘅華叔，認真亂龍。
（圖）曾憲梓連邊個去咗美國都搞錯，亂咁鬧人。
傳真︰2623-9278
電郵︰