偶像組合孭重飛嘅電影，通常票房都只係一般，但由五人男子組合嵐主演嘅《Lifeishard但happy》就好收得，唔夠年半就開拍續集。今次《Lifeishard所以happy》嘅故事承接上集，講佢哋各散東西三年之後再重遇嘅故事。但我羅拉見五子由上集嘅黃毛小子，搖身一變白領藍領，但個樣依然好babyface，好似唔多夠說服力喎！
至於故事嘅重心會放喺大野智身上，上集講佢同大佢十年有多嘅有夫之婦大搞不倫戀，今集變本加厲，除咗同佢愛人發展半同居生活，大野重為咗佢變咗白領工作奴㖭，而且睇見佢挨落個做得佢阿媽嘅女人身上，真係唔多開胃。
而最搞笑嘅新橋段，反而係相葉雅紀變咗個乸乸哋嘅織冷衫高手，佢成日着住自己織嘅冷衫出場，真係搶鏡到爆。同時二宮和也嘅撒亞人look，都幾超現實。
被問到對今次續集有乜期望，松本潤就做代表話：「套戲好能夠講到我哋呢個年紀嘅人嘅迷茫。」咁又係，不嬲呢類勵志戲喺日本都好煞食㗎啦。