京官近日連環炮轟到美國出席參議院聽證會嘅三名立法會議員，日前有人講過句話馬丁等人去「拜洋菩薩」。不過職工盟李卓人不單止唔嬲，重鬼咁得戚，日前去國會同議員開早餐會時，臨入國會前突然問馬丁同涂謹申：「有人話我哋來拜洋菩薩，入廟拜神，使唔使鞠個躬先？」
馬丁係天主教徒，而且知道阿人搞笑睬佢都儍，阿涂亦冇你咁好氣，阿人就自己向住國會大樓合十行禮，「咁先係真正拜洋菩薩嘛！」
另外，主持「香港民主狀況」聽證會嘅參議員SamBrownback（布朗巴克）可說係中國通，應該都知道馬丁返唔到大陸，但喺會上卻明知故問，「為甚麼你係香港立法議員，卻不能到中國呢？」
馬丁答佢話，六四事件後佢被視為異見人士，不能踏足大陸，又笑稱美國人權英雄馬丁路德金有一個夢，香港嘅馬丁．李就有兩個夢，「一個係追求民主，一個係返回家鄉。」呢場「政治棟篤笑」全場為之起哄。
（圖）阿人（右）向住國會大樓合十行禮，馬丁知道阿人搞笑睬佢都儍。
傳真︰2623-9278
電郵︰