近排天氣叫做暖番少少，雖然有排都未到夏天，不過估唔到生產商已急不及待推出相關產品。呢兩款由OLYMPUS推出嘅DC防水殼，以紅色襯透明膠製造，相當之搶眼，落到水分分鐘重靚過啲魚仔。其中一款PT-023型號防水殼，對應該廠最新嘅800萬像素旗艦機C-8080WideZoom，水深極限為40米，淨係睇佢隻大眼已經夠誇張，而C-8080嘅WideZoom功能，最啱將廣闊無邊嘅海底靚景盡收其中。另一款型號為PT-022嘅防水殼，對應同廠嘅C-770同C-760UltraZoom，雖然呢兩部DC喺廣角功能上稍遜，不過機細就輕巧得多，旅行人士帶埋去游水時過吓手癮都唔錯。兩款防水殼日本預計四月推出，PT-023售價為31,000日圓（約港幣$2,263），而另一款PT-022則售25,000日圓（約港幣$1,875）。
記者：徐影龍
官方網址：
