無綫前晚請來陳奕迅（Eason）、容祖兒等為葉蒨文（沙麗）的節目任嘉賓，Eason還和沙麗暢談家事，更踢爆阿Lam愛補襪，沙麗就負責修理電器。
葉蒨文前晚在無綫將軍澳電視廣播城錄影《葉蒨文瀟灑同行25年》節目，緬懷她十七歲入行，至今二十五年的演藝生涯，更請來張學友、劉德華、李克勤、容祖兒及陳奕迅擔任神秘嘉賓。
不過沙麗老公林子祥（阿Lam）則沒有到場支持老婆，主持鄭裕玲要求沙麗獻唱《情人知己》給老公時，沙麗拒絕說：「佢都唔嚟，做乜要我唱歌畀佢聽呀。」
後來Eason與沙麗聊天時，Eason說：「佢兩公婆好得意，記得我有一次同阿Lam傾偈，佢話自己成日喺屋企補襪，沙麗就搞電器整HiFi。」沙麗則回敬說：「你女朋友都好好，上次我哋做騷，佢都煲湯嚟。」然後二人合唱《傷逝》，Eason不時甩嘴，沙麗亦不慎走音，二人共重錄了四次才成功，Eason說：「我哋想夾得好啲，唔想虐待觀眾耳朵，因為視覺上我已虐待咗佢哋。」
沙麗接受訪問時亦說：「我哋冇排過先唱得唔好，我又興奮得滯先走音，又要講嘢又要唱歌，大家玩吓啫，我唔介意。」問到為何阿Lam不來，沙麗說：「我出門口嗰陣，佢都唔似要去街，我返去會問佢點解唔嚟。」問到何以要阿Lam做針線，沙麗則整電器，她說：「佢唔鍾意有電嘅嘢，佢連電腦都唔鍾意，我都唔鍾意，不過都要有人整㗎。」
至於容祖兒前晚就罕有地穿着低胸上衣亮相，身材玲瓏浮凸，祖兒說：「已經貼晒膠紙，唔怕走光，我覺得呢件衫低胸得嚟好甜，好有少女feel，買咗冇理由唔着嘛。」
採訪：卓寶花、胡比 攝影：何國豪、陳烱威
