民主派「四人組」遠赴美國，唔少土共同京官激到紮紮跳，除咗破口大罵，重四出搜尋佢哋「勾結」外國勢力嘅罪證，身在華盛頓嘅涂謹申話，自從佢同馬丁踏足華盛頓開始，就有個打扮斯文，但舉止神秘嘅男人跟住佢哋，每到一個地方，總有呢位仁兄嘅吊靴鬼身影。
被要求轉房
根據阿涂描述，該名「狗仔隊」係一名華裔中年人，由於佢打扮同外形都十分平庸，都幾難認得出佢個樣，不過唔知呢名狗仔隊有心定大意，竟然俾阿涂一眼識破，「我企喺lobby打電話，傾咗成十分鐘，佢就不停咁行來行去，係人都覺得佢有景轟啦。」
阿涂又話其實噚日食早餐時，已發現遭人監視，酒店又突然以電力有問題為由要求佢轉房，「可能住緊個間未裝好偷聽器。」至於係邊方面派人喺美國「傍」住佢哋，阿涂話無謂估，不過，若然係美國中情局，點會跟人跟到好似維園阿伯咁款。
（圖）阿涂話跟住佢同馬丁嘅，係一名華裔中年，佢哋去到邊，呢位仁兄都出現。
傳真︰2623-9278
電郵︰