樂壇大姑媽艾頓莊（EltonJohn）最近見到美國女名嘴露絲奧當奴（RosieO'Donnell）同女友拉埋天窗，搞到佢又籮籮攣，挑起佢一顆恨嫁的心。大姑媽話如果英國許可，佢一定會拖住同居十一年、現年四十一歲嘅男友大衞芬尼斯（DavidFurnish）步入教堂。
現年五十六歲嘅艾頓莊，八四年同過一個德國女子結婚，但佢之後先發覺自己原來係鍾意男人嘅。雖然佢有錫新娘嘅經驗，但大姑媽覺得想好似露絲奧當奴同佢嘅同志愛人結婚咁至夠浪漫喎。不過佢話唔想去三藩市同紐約呢啲同志天堂結婚，而會等英國法例通過，同大衞一齊爭做第一對喺英國結婚嘅同志。
大姑媽好認真咁話：「我好渴望同我個男友結婚，真係願意以身相許畀大衞。無論如何，我心理上一早已準備好實行呢件事。」
好感性嘅大姑媽重話：「英國法例一通過嘅話，我同大衞就會即刻去註冊。假如啲情侶想作出生命嘅承諾，但係又得唔到保障，咁我哋即係生活喺一個好病態嘅世界！」我大口羅拉都希望大姑媽早日夢想成真，不過，唔知佢到時會唔會扮個可愛肥新娘呢？