章小蕙計劃以SM造型拍攝的電影《桃色》去年底被指胎死腹中，近日有傳電影獲注資，不過該片導演楊凡昨日表示自己角色被動，並指章小蕙乃「新聞女王」。但章小蕙表示不覺被寸，她亦承認電影有望開拍。
由楊凡執導、章小蕙主演的情慾電影《桃色》，近期惹來不少爭議，早前章小蕙的ＳＭ造型照哄動一時，不過她其後卻聲稱因尺度問題，宣布該片胎死腹中。及至近日有報道指《桃色》獲重新注資，開拍有望。
導演楊凡昨日在尖沙嘴出席第二十八屆香港國際電影節記者會，他本來對《桃色》一片甚為迴避，其後不停暗寸章小蕙，楊凡說：「有冇咁巴閉呀，外國注資？我唔知喎。」提到章小蕙指該片有望開拍，楊凡說：「乜佢重有講嘢咩？我要同佢溝通，佢做老闆、係producer（監製）嚟㗎。」言談間楊凡對章小蕙顯得甚有隔膜，對此他說：「係囉！冇嬲，點解要嬲啫？佢係新聞女郎，唔係，應該係新聞女王，KingofNews，女王最犀利，我就唔想講嘢喇！」
楊凡指記者應向章小蕙查詢，他語帶雙關說：「做導演係好被動㗎！我冇話唔同乜嘢人合作，拍戲喺未拍之前，劇本梗係千變萬化㗎啦！」
而身為《桃色》主角的章小蕙，前日突然離港，身在外地的她得悉楊凡上述回應後哈哈笑說：「佢成日都咁講笑㗎啦，我哋關係好好，啲朋友有時叫我『頭條女王』㖭！」章小蕙不願評論《桃色》是否開拍，但她否認有外國資金注入，章小蕙說：「我冇講過有外國資金注入，報道係人哋寫，事實係冇外國資金，不過唔係唔拍，總之我𠵱家聽從導演講，唔接受訪問講拍戲。」章小蕙續說：「我哋冇嘢，日日開會，一星期見幾次，噚日重送咗一部3G電話畀我㖭，以後同人講電話都要化妝。」
此外，台灣已故富商黃任中的契女小潘潘在台表示十分崇拜章小蕙打不死的精神，經歷失婚、欠債依然堅強，誓言要像她一樣，走出黃任中陰影。
採訪：陳月萍、林妙萍 攝影：陳偉權
