余文樂前晚喺中環為新片《江湖》補戲，呢場戲係講佢追斬張學友同劉德華，電影公司安排咗水車喺現場營造下雨嘅效果，樂仔拍呢場補戲時，淋到全身濕晒。
樂仔話拍《江》片時發生好多怪事，除咗之前學友喺西環拍外景嗰陣，有工作人員聽到有女人叫救命，同睇到一個貌似學友嘅鬼影外，樂仔話佢日前同陳冠希喺火車廠拍攝一場兄弟拗撬戲，拍嘅時候重好正常，但點知過後睇playback，發現啲菲林全部摺晒，樂仔話：「真係好奇怪，五盒菲林都摺晒，唔知可唔可以用技術整番好，但如果『老爺』（指曾志偉）要重拍，我一定都會抽時間。」對於拍攝期間發生連串怪事，樂仔話：「我哋每次拍之前都有上香，雖然唔順利，但好戲通常都有阻滯。」
有指導演黃精甫拍攝時喝罵劉德華同曾志偉，問樂仔有冇試過俾導演鬧，佢望一望黃精甫即話：「冇，華哥同志偉講笑啫，導演份人冇嘢，拍呢部戲好有壓力，佢有自己嘅見解，導演係一個好有信心嘅人。」
李燦森前晚接受商台《嘩！嘩！嘩！打到嚟》嘅訪問，早前佢同吳彥祖為MTV台錄咗個遊戲節目《WhateverThings》，大玩跣大鑊遊戲，佢話只係想玩吓，佢重話何超儀同陳子聰都玩過，不過佢哋咁玩都係想挑戰同滿足自己。
珈潁、陳展鵬同李綺雯，早排去咗台灣拍亞視旅遊特輯《台灣溫泉之旅》，珈潁話自己浸完溫泉之後，身上啲小疤痕好神奇咁唔見咗，不過到咗行程嘅最後一日，佢就發燒入咗醫院，成隊人要陪佢去醫院，令佢好過意唔去喎。
劉浩龍噚日抱恙到港台接受訪問，佢嘅緋聞女友何韻詩又咁啱病咗，所以俾人笑佢哋係咪因為親嘴關係交叉感染，劉浩龍就即刻叫大家唔好亂諗，重強調自己冇拍拖喎。對於許志安近排傳出唔少緋聞，佢就力撐安仔好專一，尤其係對桌球方面，唔通佢意思係話安仔其他方面唔專一？
林嘉欣日前為少女雜誌《COSMOgirl!》拍照，對於外間讚佢笑容甜美，佢話：「因為好多人想我對住鏡頭靚啲，咪叫我笑多啲，所以我咪配合囉！」問到林嘉欣重視外在美抑或內在美，佢話：「我覺得內在美重要啲，因為咁先會有自信，人都會變得有吸引力。」
