曾經數度易主，見證樓市起落巨變嘅香港置業，藉住今次樓市谷底反彈，想嚟一次大翻身，由約莫七百人嘅中型行，未來一年大舉增聘四百人，將公司越級提升至逾千人嘅大行之列，分行就由二十八間，三級跳至一百間。
港置董事胡日發話，邁向大行行列，係佢哋今年嘅目標，除咗繼續增加人手，鞏固一手市場業務，又會增加二手市場人手調配。
既然有晉身大行嘅氣魄，視為身份象徵嘅港置topsales組織置尊會，入會資格也大幅提高，主管級人馬，全年營業額，以往只係八百萬，今年定為一千萬，只限十人。前線員工營業額，就由以前一百二十萬，升至一百八十萬。
今年新一屆會長由新界區王品弟當選，兩個副會長就係九龍區嘅姚偉南，同埋港島區嘅翁祥生。胡日發同執行董事陳坤興，噚日重親自幫佢哋「加冕」，個場面就好似阿爸第一次幫個仔打煲呔一樣，都幾搞笑。
「只要有得炒嘅地方，就有香港人」，呢句一啲都無錯。
話說大家都預計到，香港同深圳融合，只係遲早嘅問題，近年深圳樓市又年年升，吸引到炒性難改嘅香港人北上炒樓。
近文錦渡口岸嘅朗鉅御風庭，聽中原中國金志剛講聽日賣，但已經收咗四百幾票，唔少重係嚟自香港嘅投資客，其中一個，入咗五十幾張，中籤機會率係八分一。
蘭西諗，呢位投資客咁積極，唔知會唔會買番十間八間呢？
如果上邊都興炒籌嘅話，佢又可以將用唔晒嘅quota，炒吓籌賺番筆。
新地油麻地窩打老道8號示範單位，噚日終於曝光。設計可以用另類嚟形容，室內燈光昏暗，玩神秘感，用嘅顏色都係比較深沉。個盤話賣「都市新貴族」概念，唔知啲新貴族，係咪鍾意間屋晝夜不分呢？
為咗顯示間隔有幾靈活，設計師重將原有間隔改頭換面。兩個示範單位嘅廚房，都轉為開放式，飯廳空間多咗。廁所拆牆，換上玻璃，連浴缸都換埋，其中一個重整到好有Spa特色。
示範單位係就係好創新，不過，蘭西有啲擔心，買家睇完，都未必知道收樓嗰陣，實際間隔應該會係點。
樓市㷫烚烚，價錢係咁升，唔少買家入咗貨後，發現銀行估唔足價，搞到做唔到按。
中原測量師行新一期市場評析就以估值做話題，指出估價唔足，好多時在於測量師，因為大多只參考登記咗嘅數據，再加上時間調節嚟估價。
但係近排樓價急升程度，十足十97年一樣，測量師手上嘅成交資料，隨時係一個月前嘅，有乜辦法唔脫節？
聽業內人士講，有啲新盤高低層差價勁，好似油麻地一個新盤，雖然話高低層景觀有唔同，但呎價就相差一倍。聞說，由於差幅太極端，銀行好難估足價。
蘭西
電郵地址：