大市噚日彈過一陣，但收市都係跌，恒指報13451，跌2點，期指就略為轉強，低水收窄到83點。國企指數升過，亦係跌市收場，大行似乎重係㩒住，可能未到時候。好似隻中石化（386），一度搶上3.4元，但主力以JP摩根為主的沽盤，就由高位掟番落嚟，3.275元「拜也」亦幾乎質清，結果收3.3元，跌1個位。
基金揸中石化，JP摩根係最多一間，到2月中為止，揸成13.6億股，佔H股8.15%，第2位先係摩根士丹利，佔5.56%。JP摩根減持，有可能，佢哋周不時都又買又賣，但個勢向上之時，要沽貨都唔使咁急啩！事實上，呢輪有多間大行推介中石化（噚日又多一間），初步目標價係3.9元，理由係中石化有上游同下游業務，油價急升，上游有利，而石化產品市場需求殷切，價格上升，下游亦有利，即係兩瓣都掂。
其實，中石化走勢亦好靚，兩個月來形成圓底收集，現時3條平均線都在3.25元水平，只要收市高過3.4元，擺脫3條線，圖表即時出現入貨訊號，照度上去，短期目標4元，可在其突破時追入。
噚日成交較活的工業股，以德信科技（1228）的升勢較悅目，高收0.365元，升5.8%。1個月前，本欄曾作推介，當時股價0.315元，目標價係0.42元至0.48元。
德科生產計數機為主，去年進軍多功能手表同電話業務，生產規範同廠房面積增加1倍，重開展OEM業務，首次與歐洲精品製造商合作，生產電子遊戲卡，另接獲全球大型連鎖快餐店的計時器玩具定單，供應北歐，作禮品使用。
為滿足市場需求，集團再添10條生產線，預計本月中可投產，計算機產能由每日30萬件提升到50萬件，手表每月可生產60萬隻，電話30萬台，加上快將投產的高級液晶體顯示屏，德科成功將業務多元化，毛利率亦相應提升。
03年度（12月年結），由於上半年受沙士影響，盈利倒退，但下半年已追回大部份失地。踏入04同05年度，集團將會進入高增長期，估計每股盈利分別為4.8仙及6.0仙，以04年10倍PE計，股價已可見0.48元。
郭兆誠