德永佳（321）噚日出現兩宗大手成交上板，合共950萬股，每股作價5.75元，涉資5462.50萬元。據聞呢手貨由機構投資者接咗，稍後係咪大炒就唔知，不過德永佳噚日一跌至5.75元即見反彈，短期內呢個位有相當啟示性。
裕元（551）用3.2億元買入鷹美股份，現控制鷹美（2368）44.96%股權，鷹美全日勁升14%至2.425元。雖然今次出手收購係裕元而非新澧（1223），令新澧少咗一個擴展業務機會，但新澧仍逆市升3.8%。黑客話，今次鷹美配售1.05億股畀裕元，另外配售3500萬股出街，配股價只係1.06元，承配人大把水位食胡。
電盈（008）噚日公布業績，再錄得驚人虧損逾60億元，真係唔知佢幾時至可以派息？小小超似乎想偷超人條橋套現，超人將和黃（013）固網業務注入中聯系統（757），跟住配售中聯套現，而小小超就想將電盈地產項目注入東方燃氣（432）借殼上市。現時樓市氣勢如虹，電盈咁快想出售地產項目套現，唔通小小超睇淡個市？
據聞除咗貝沙灣項目外，電盈亦可能將機樓物業注入東方燃氣。東方燃氣股價由1月底0.30元樓下起步，2月一度急升至0.70元水平至回落，之後重停埋牌，市場一直冇佢消息，今次獲得小小超垂青，唔知復牌後會唔會升到好似當年嘅得信佳呢？
中信21世紀通（241）在北京設宴招呼各界好友，宣布公司改名兼正式歸入中信旗下，據聞老細王軍講到明要做番場好戲。
阿虎