奧斯卡金像獎頒獎禮，啲Kiwis（紐西蘭人）大顯威風，十一項提名得十一個獎，真巴閉，估唔到呢個小國啲電影人才可以征服荷李活，一套「魔戒三部曲」令美國電影人稱神，另外澳洲人MelGibson嗰套PassionforChrist在美國又大收特收。可見電影無國界，全球化得好徹底。
睇奧斯卡頒獎，一半理由係睇靚女大明星着乜嘢衫，CatherineZetaJones穿上Versace，影后CharlieTheron着Gucci，SandraBullock着Oscar delaRenta，NicoleKidman着Chanel；個個身材弗到漏油，真係靚人靚衫靚胸靚背脊，逐一呈現，直情係賞心樂事。
荷李活係夢幻工場，與現實完全脫節。美國啱啱發表咗一套SizeUSA嘅報告，調查人員喺十三個城市量度咗一萬人嘅size，搵出中數、平均數，畀美國成衣業、陸軍、空軍參考，等佢哋設計成衣、制服之時，唔會產生太大誤差。
結果就係現實，好現實：十八至二十五歲嘅白種美國女士，平均身高五呎四吋，重一百四十八磅，三圍尺碼係三十八、三十二、四十一，同年齡白種人嘅尺碼係：四十一、三十五、四十一，五呎九吋高，一百八十磅重。咁嘅size，點樣着Gucci,Versace呀？美國商人最叻係賣「夢想」，例如每個女孩子都玩芭比娃娃，而芭比嘅三圍係三十九、十八、三十三喎。真實世界嘅女孩子腰圍係三十二吋，差得太遠咯。美國成衣業一向以8號size為女性服裝標準（即三十五、二十七、三十八），睇完呢個最新SizeUSA報告，為之暈得陣。