特區文革風暴，愈玩愈大，終於正式國際化。李柱銘等四師徒去到美國，原來不止去國會有碗話碗，有碟話碟，重叫埋兩飛，直頭入白宮，榮獲美國安全顧問賴斯接見，另外重有助理國務卿等高官。至於布殊，會唔會去完廁所行過條走廊，經過會客室，「無意」中撞見李柱銘，順道握手寒暄問候，叫佢有乜問題，即管同賴斯講，好似當年見達賴喇嘛咁有創意，睇嚟都視乎布殊心情。
李柱銘有得見賴斯，都係因為有人喺特區亂咁賴屎。甚麼狗餅論、黑四類，搞到臭崩崩，北京拒絕溝通，土共亂發噏風，咁又造就埋李柱銘再次揚威國際。咁搞落去，李柱銘同司徒華，睇怕好快就會榮獲埋諾貝爾和平獎，繼港人葉錦添開創攞奧斯卡紀錄之外，重會開多一項港人威威嘅國際紀錄。
難怪國家級嘅唐唐，作出黑色幽默式回應，話李柱銘冇必要去到咁遠「拜廟」，請「洋菩薩」。冇辦法咧，鬼叫中央搵人問鄧小平米先，代表鄧小平亡靈「解釋基本法」。李柱銘惟有去美國拜廟請洋菩薩，對抗鄧公問米幽靈，有基本法不依，特區搞到迷信風氣咁盛，又係孰令致之？
至目前為止，北京嘅反應，係「下熱上溫」，即外圍人物及報刊如蕭蔚雲、邵天任、《瞭望》及本地左報等去到盡，反為中央大員重未點名。呢場牌，重要睇三二○台灣打一隻乜嘢出嚟，知情人士話，若然係陳水扁冧莊，局勢急轉直下，國家會好冇理性，有乜股票，三二○前好出晒貨。
而美國點解出埋白宮高官嚟招呼老李？因為南北韓六方會談，不歡而散，美國當初諗住中方會約束睇實北韓嘅肥仔金，點知一經摸底，至發覺中國對肥金唔係咁大影響力，加埋核技術擴散巴基斯坦，全部上晒中國數，美國佬面色一黑，對中國即時冇面畀。
特區政制問題，早已唔係香港內政，亦唔係中國內政，而變咗中美外交嘅一個活索，甚至成為國際政治嘅一個環節。重以為香港九七後逐漸俾全世界遺忘，估唔到呢吓抽頭反彈，升勢重勁過恒指上到萬四點，香港國際地位突飛猛進，狗餅庸同曾獻曲兩個排頭位，直頭係居功至偉。
美國佬重有一招深謀遠慮，就係民主黨總統熱門候選人克里亦親自出席聆訊會。大家都係民主黨，同名三分親，布殊就算冇得連任，白宮新人今次大家摸底熱吓身，即是話特區問題經已成為美國跨黨派共同關注審查嘅事務，你話係咪呢鋪玩得好大呢。自從肥彭下旗歸國，香港咁耐都未試過得蒙咁多國際人士關懷，香港嘅國際旅遊業應該睇好，除咗狗餅庸，田少反戈一擊亦有功，身為旅協主席兼戰友嘅周梁飲得杯落咯。
傳真︰2623-9278
電郵︰