簡尼同波勒大家都係拜仁同德國國家隊隊友，但係兩位球壇超級巨星即將各為其主。邊位轉會？非也，只係兩大球星嚟一次漢堡包大戰。
事緣簡尼同波勒齊齊俾漢堡包連鎖店睇中，做「生招牌」，簡尼就代表「BK」牌，波勒屬於「M」字頭漢堡包，實行嚟一次商業擂台戰。當波勒知道佢隊友簡尼會幫「BK」牌做代言人之後，都覺得呢個對碰好搞笑；話晒球星為漢堡包品牌打商業戰的確第一次見。
我求大俠好想睇佢兩個嘅廣告係點樣之餘，亦質疑佢哋做漢堡包代言人，會唔會有衝突；話晒快餐營養成份有限，球員形象一向係有良好體魄，隨時有誤導成份喎？
洛賓來季加盟車路士，由於佢踢左翼，難免同杜夫爭位。杜夫對「車仔」收購決定稍失望，始終𠵱家已經有咁多中場球員，下季要爭位更難。不過，以今季「車仔」各新兵表現，杜夫已經算係交足功課，況且佢自己可以踢右中場，到時有表現就唔怕同人爭位，係咪？
早排雲達不來梅射手艾列頓可能會轉國籍，代表卡塔爾國家隊，呢位巴西前鋒終於表態，下周飛去中東搞手續，攞埋一百萬歐元轉籍費，最快月尾世盃外圍賽可披甲。我求大俠認為呢招有問題，中東國家有錢，隨時買幾多個「外援」都得，所謂國家隊完全無晒意義！
曼城領隊基瑾一直擔心隊中馬賽借將後衞尹貝頓愈打愈好，季尾借用期滿後俾其他球隊搶人。點知尹貝頓喺另一邊廂表示，呢次肯被借到曼城，純粹想減輕馬賽財政負擔；若然馬賽賣走佢，佢未必會去曼城！睇嚟基瑾要擔心嘅唔係點留人，打好啲成績爭番個歐洲賽資格先啦。
香港體育精英代表日前由李麗珊帶領下公開向立法會議員宣示對政府撥款資助嘅憂慮，唔使幾耐，董特首就接見各代表，重作出若干保證㖭；原來佢哋早有後着，噚日就寫公開信畀各大傳媒，澄清立場同向政府列出晒啲要求。梗係喇，老董一句「冇講即係唔存在」咪弊！