四十三歲的周啟生每天都堅持健身，擁有四十一吋胸的他，健碩身形足可當上香港拳霸，但他自嘲樣衰無色相可賣，故在稍後添食的個唱中，只能以歌會友。
周啟生在早前舉行的個唱中展露六嚿腹肌，他坦承每天會盡量抽兩個小時健身、做運動。周啟生還自言十二歲時，六嚿腹肌已追隨着他，至今超過三十載。
日前周啟生在跑馬地接受訪問時說：「我十歲八歲嘅時候，已經好崇拜李小龍，所以我好細個就練功夫。我嘅腹肌好早就有，唔擴胸嘅時候有三十九吋度，擴咗胸就有四十一吋度啦，平日我唔煙又唔酒，早睡早起，淨係運動、彈琴同做音樂，生活好健康㗎。」
周啟生早前舉行個唱，反應尚算不俗，故今年他會添食兩至三場，暑假前亦會推出新唱片。作為前輩的周啟生，出碟時要與時下歌手一樣做密集宣傳，他說：「如果出碟係嚟見報嘅話，我唔贊成。張偉文唱歌好聽㗎，當初佢嗌啲公司，都冇人同佢出碟，但佢賣咗幾萬張呀，𠵱家啲人就後悔。何況我靚仔過張偉文，但佢就有份量過我。」
談到時下的偶像歌手，周啟生說：「我自己樣衰，冇色相賣啫，惟有勤力啲去練歌。人哋啲靚女行出嚟唔知幾好睇，我睇見李彩樺、Yumiko（鄭希怡）唔知幾開心，就算Kelly（陳慧琳）唔識唱都掂呀，更何況佢唱得好。」
採訪：朱倬誼
攝影：陳慧安
化妝及髮型：KellyMak（Headquarters）
場地提供：香港足球會
