渣打銀行董事王冬勝噚日應港大學生邀請，講吓求職貼士，八方當然要去偷師。冬冬用英語同學生講，面試第一重點係要有良好嘅儀容外表，畀對方良好印象；亦要準備好一份台詞，向公司表達你對行業嘅認識，無論考官問你乜嘢問題，都要搵機會發表呢份台詞。冬冬又話自己揀人，就會首選嗰啲肯學同要有成功目標嘅應徵者。
佢又唔贊成學生為賺多一兩成人工就跳槽，因為要喺一家公司建立良好根基需時多年，以佢為例，以前喺花旗銀行打咗十七年工，以往跳槽嘅舊同事最後都唔及佢位高。
另外，八方噚日見到外電，引述渣打集團年報披露，冬冬嘅頂頭上司、渣打集團行政總裁戴維思去年薪酬大幅上升百分之二十七，達到二千一百三十七萬元，其中現金花紅達七百八十萬元，認真羨煞旁人。
（圖）王冬勝勸啲學生唔好為咗賺多少少人工就跳槽。
傳真︰2623-9278
電郵︰