恒指高低波幅雖達124點，但個市總算定番，埋單只唔見2點，期指則有43點進帳。個市冇再散落去，「功臣」在於滙控（005）冇跌，恒生（011）爬高50仙。不過衰在聯通（762）由9.70元跌落9.45元，拖低恒指10點，中移動（941）唔見15仙，拉低恒指9.6點。
只要最重磅嘅滙控唔再跌，短期大市有望技術性反彈，係時候博恒指Call輪。3大熱門恒指Call輪中，9282、9422、9443，將啲數據拼埋比較，就會發現9282最抵買。
9282喺5月杪到期，輪價22.9仙，昨日跌3%，溢價得1.9%，槓桿率18.9倍。9422今年6月杪到期，輪價35.5仙，昨日冇升跌，溢價2.8%，槓桿率16.1倍。9443於7月初到期，輪價22.9仙，昨日跌3%，溢價去到4.6%，槓桿率23.5倍。
中電信（728）集資傳聞淡化，股價定住喺2.85元，是日跑贏其他兩隻國內電訊股，短期內估計升多過跌，但要搵標準Call輪玩吓，可選擇者無多，9910數據比較啱睇，隻輪6月夠鐘，輪價64仙，溢價2.5%，槓桿率4.5倍，但弊在交投冷冷清清。
電盈（008）派成績表，蝕61億元，相信股價會有不利反應，電盈Call輪暫時咪多手。想搞Put輪，亦冇得好揀，9337係鎖定回報輪，啲實際數據難計，唔係個個啱。
章盛