這一輪聽到咁多噪音講愛國，煩死人，尤其是好多自稱愛國者，唔係外國人就係老而不，佢哋講愛國，好聽啲就係得啖笑，難聽啲就係令人作嘔，好似一位八十幾歲穿睡衣見記者嘅北京老人，被稱為護法，實際上見識淺陋，如果牟宗三先生仍在，一定鬧到佢暈：「你有冇讀過我本《政道與治道》呀？」佢發表談話當日（上星期日），碰巧陶傑介紹勞思光先生嘅《歷史之懲罰》，中大出版社應該立即叫呢啲老人買番一本。內地啲所謂專家學者，聽其言辭，唔少係思維混亂，邏輯亂龍之輩，可見內地社會科學之落後，與科學相差好遠。
聽得咁多噪音，要清一清腦袋，於是搵番羅大佑《音樂工廠》中之「皇后大道東」，興奮番一陣，再聽吓佢唱「東方之珠」，感慨殊深；呢首歌直情可以做香港特區嘅「區歌」，以後在學校學生大合唱「東方之珠」，可以培養佢哋對香港嘅歸屬感。以前聽過港台邵盧善與黃毓民唱「東方之珠」，聲音帶沙啞，感情極豐富。呢排黃毓民晚晚講到聲嘶力竭，痛論愛國，不如晚晚喺節目中播呢首歌，降溫降溫。
羅大佑多才多藝，在香港失蹤多年，突然返嚟搞演唱會，叫做「搞搞真意思」，重要響紅館㖭，真夠膽。聽有份主辦嘅吳思遠大導演講，台灣、大陸都有fans組團來港捧場助威，三月十二、十三日兩晚，紅館必有一番熱鬧矣。左丁山當然唔執輸，一定買飛去聽羅大佑唱「東方之珠」！