前日講到水貨大亨袁仁祥好辛苦先Book到期搵名師做「彩光」，點知為過日本撲UnderCover個「溶解系列」而被迫放棄，可想而知呢個系列幾咁巴閉。袁仁祥繼續手舞足蹈，發表佢對「溶解熱」嘅睇法：「唔知點解UnderCover今次呢批貨咁勁，好多平時冇着開呢個牌子嘅人都嚟問有冇貨？尤其啲藝人最捧場，可能呢批衫夠誇張，着出嚟夠搶鏡。你知喇，呢批衫加晒特別效果，着咗上身，街外人驟眼睇誤會：『咦，做乜你着住件衫喺度溶緊㗎？』如果穿着者配合埋全身扭曲姿勢，再加兩分痛苦表情，甚至會被誤以為中咗化骨綿掌，連衫帶人被溶解成輕煙㖭，唔講重以為佐治魯卡斯背後幫你做緊特技，到時就唔怕搶唔到娛記嘅閃光燈咯！聽講Joyce返到貨，但全部已經留晒畀熟客，潮界填詞人Wyman一個人就訂咗五件，買完行貨重唔夠喉，重走埋去水貨舖掃！除咗Tee外，嗰件乾濕褸亦係最搶手，今季咁興TrenchCoat，再加埋『溶解』，點可以唔買吖？」
主持人：大食Jack
八卦熱報：
