李柱銘一行去美國，準備對國會「有碗話碗，有碟話碟」，愛國陣營又受刺激，再行反枱，掟爛多一棟碗碟。李柱銘話佢最想去北京，若然中國邀請，佢會唔向西行，改為北上，呢句說話本來心平氣和，點知刺激到中聯辦肥阿頭破口大罵「發白日夢」。
你又話李柱銘係中國人，身為中國人喺中國又冇行動自由。若然李柱銘犯咗中國國法，可以等佢一入大陸就拉。唔拉，即是冇犯法，既然冇犯法，點會咁怕李柱銘去美國出席聽證會？
不過現時嘅特區土共青筋暴現，只識反枱咆哮，經已冇晒理性，講道理都係多餘。政制事務局局長林瑞麟公公，亦深受情緒化感染，喺立法會亦大罵李柱銘邀請美國干預香港事務，兼表示「失望」。佢重帶頭表忠，話美國國會若然邀請佢去講嘢，佢都唔會去咁講。
林公公又使唔使咁勇呀？翻查吓佢嘅紀錄：喺八十年代中期，林公公曾經擔任香港殖民地政府駐英助理專員，當時佢嘅職責，就係負責聯絡英國國會議員，協助佢哋了解香港事務，包括安排啲英國議員訪港。可見將香港事務國際化，向國際滙報香港實況，林公公以前亦親手做過呢一瓣，又唔見佢嗰陣時咁有民族大義，夠膽拍枱劈炮唔撈？
中環好多人搖頭歎息：中央人民政府嘅心理，同一九八九年六四嗰陣時一樣。當年天安門廣場大學生只不過要求對話，商討反貪污問題，但中央人民政府就自認大晒，拒絕溝通，卒之搞到坦克清場，再遭到國際制裁。香港人7.1大遊行，自由黨田北俊上北京見港澳辦，得到指示，話23條立法可以擱置，跟住就走落嚟香港，學當年趙紫陽，辭去行政會議職務，摧毀23條立法。
有中國問題專家分析：中央人民政府7.1後一大輪默不作聲，各政黨上京見曾慶紅，人人都記得，有記者問到：民主黨可唔可以上北京會見，曾慶紅答：「將來只要有工作需要，都會見」，並冇好似中聯辦肥阿頭咁講係「發白日夢」。有啲人本來以為中方有少少轉性，慢慢同由香港人票選嘅議會代表溝通，點知都重係不離「六四思考模式」。
呢七八個月之間大陸發生過乜嘢事？留意吓最近邊個蒲頭多咗就知。加埋台灣總統大選，大陸軍方勢力自然會抬頭，上高爭權奪利，呢個時候香港做正磨心，就梗係有少少唔好彩。專家話：與一個變幻莫測嘅政權為鄰，就預咗係咁。今日甲掌權，聲氣好少少，明日輪到乙霸位，就想殺雞儆吓猴，而特區啲土共，一個個都係說謊專家、鸚鵡託世，全部見風駛𢃇為自己上位利益打算，邊個會為香港好？香港人以為真係有「港人治港、高度自治」？冇錯，係發白日夢。自己唔好彩咯。
傳真︰2623-9278
電郵︰