碼頭垂釣，魚毛三幾條，魚穫好極有限；舢舨海釣，飄洋過海隨時暈船浪；岸邊磯釣嗎？硬食海風少點體力也不行，數來數去，還是魚排閒釣最舒服寫意，魚排除提供魚具與魚餌，還有繩床給你小睡，興起，釣過夜魚都無問題。
記者：戴維浩
攝影：梁細權
模特兒：Kanis
地點榕樹澳，乘駁艇登上魚排，花數分鐘了解魚排環境後，Kanis望着手中的各類魚具發獃：「我根本唔識釣魚，連魚鈎都未識穿！」不打緊，有工作人員耐心教導最基本的綁線穿鈎、放餌上鈎，Kanis人聰明，一點即透：「沙蟲上鈎要每截切半吋長；用生蝦做餌就要連殼鈎實蝦背，放到落水都重識腳撐撐，引魚上釣。」
上過基本課，即時實戰，工作人員先撒誘餌下海：「誘餌唔可以亂用㗎。」何解？「市面上好多誘餌粉，成份含有蔗渣、豆粉甚至酒精，用嚟灌醉啲魚，不但污染海水，甚至會令海床發霉。」魚排提供的誘餌則是蟹殼磨粉，可自然分解，單憑氣味足以吸引海魚。撒完誘餌要等15分鐘，待海魚游近便可拋絲放餌，技術好有運氣，隨時有三五七斤石斑、鱆紅、鱲魚、火點、泥鯭上釣。
之後2小時，石狗公、火點陸續上釣，總計有5尾海魚收穫，喜孜孜的Kanis忽然有此一問：「如果真係渣到連1條魚都釣唔到，咁點算？」不用愁，釣魚排內2斤以內的養魚吧，養魚，當然要付錢，火點、紅魚每斤$20，青斑、石蚌、鱆紅每斤$35。
舉竿過久，釣累了，Kanis又問：「有無地方可以休息呀？」當然有！就躺在沙灘椅上喝杯凍飲，順便曬曬太陽，魚排中間位置還有鞦韆椅，搖搖晃晃的吹海風，真爽。
一來三分鐘熱度，二來收穫已甚豐，好動的Kanis嚷着要遊船河，魚排老闆阿曾人友善：「橫掂得閒，就免費兜你一轉睇企嶺下海喇。」事先聲明，有求，並非必應，魚排人手充裕，阿曾才會開船。短短15分鐘船程，近距離觀看三杯酒，暢遊海灣風光，兼登陸對岸的西徑沙灘散步拾貝殼，就當是額外獎賞吧。
遊完船河，Kanis喊餓，阿曾好人做到底，仗義入廚，把Kanis那5尾收穫，另加海蟹、青口，弄一頓豐富的海鮮宴，海上鮮即釣即蒸，不用調味已相當清甜。不過又要事先聲明，魚排非海鮮店，作食肆用途屬違法，阿曾此舉只屬宴客，想試老闆手勢，與他混熟點吧。
食飽飽，飯氣攻心，本是時候走了，Kanis見自己兩手空空，又想釣魚，阿曾建議過夜釣通宵魚，眼瞓可以睡在吊床，Kanis問：「會唔會好難瞓呀？」只要上床時保持平衡，放鬆睡姿，保證舒舒服服睡到天明。
甘生：「榕樹澳空氣好，環境靜，喺度釣通宵魚有助減壓，釣魚為興趣，同朋友開心一齊玩通頂，有無魚穫都無所謂喇。」
藍天碧海（26994888）
地址：西貢榕樹澳魚排4076
網址：
收費：全日每位$80，釣通宵魚$100，12歲以下小童及60歲以上半價，10人以上團體8折，（包渡頭至魚排來回駁艇接送、1個魚絲手排、沙蟲1両，租魚竿則全日$20）。
榕樹澳除「南天碧海」，鄰近的「何二釣魚場」亦是不錯的閒釣選擇，魚排老闆說何二：「嚟我魚排釣魚，絕對唔會空手而回。」無魚上釣者，可以在獎品池中免費釣任何1條火點、泥鯭或石狗公等養魚，保證你有收穫。
何二釣魚場（27910276）
地址：西貢榕樹澳魚排3933
網址：
收費：全日24小時每位$80（包渡頭至魚排來回駁艇接送）
