李柱銘同涂謹申、李卓人等去美國參議院聽證會，八方聽聞發起7.1大遊行嘅民陣前發言人蔡耀昌亦有獲邀，有小道消息話，「狗哥」（蔡耀昌嘅花名）唔去，係因為此行嘅機票使費都要自掏腰包，雖然狗哥係區議員，但身家畢竟冇美國人陳啟宗咁厚，所以去唔到。
狗哥對呢個講法反應好大，話梗係唔係因為錢，而係佢覺得最重要嘅戰場係香港，抽唔出時間去美國。其實爭取民主嘅人唔少都係兩袖清風、一身傲骨，就算狗哥承認自己冇銀，都唔係羞家嘅事，起碼美國佬冇送頭等機票，自己又冇入美國籍，證明唔係漢奸。
當然大狀如余若薇就全無金錢問題，八方噚日喺立法會問佢有冇獲邀，佢話冇，就算有，都去唔到，因為呢輪日日都要上庭，無法抽身，至於馬丁此行，余若薇認為只要講老實說話，為港人請命，冇問題。
傳真︰2623-9278
電郵︰