英國傳媒揭露咗利物浦領隊侯利亞喺上周接到死亡恐嚇，目的當然係威脅佢盡快落台，唔好再做紅軍領隊，但我求大俠第一時間想到：教波唔掂，唔使死啩！我求大俠就覺得呢位發出恐嚇嘅球迷，雖然喺宣揚佢對侯利亞不滿嘅手法上做錯咗，但亦可能同時代表咗好多紅軍嘅球迷心聲。
之但係邊個有頭髮想做癩痢，侯利亞點都有幫紅軍做過「盃賽三冠王」，嗰個發信嘅球迷有冇諗過，當日侯利亞都曾經帶過歡樂畀佢。
呢個球迷咁搞法，就算真係冇去謀殺侯利亞，得閒又整封信去嚇吓人，同慢性謀殺冇分別！其實咁重殘忍，因為侯利亞曾經心臟唔妥，淨留半條人命……希望侯利亞跑慣江湖，睇開啲，咁相信佢都會好過啲。
話說上月蘇超聯格拉斯哥流浪作客巴特里，其間球證杜哥向流浪中場尼寧加爆粗，當時詳細情況係點就唔知，總之蘇格蘭足總就決定處罰杜哥。我求大俠就唔講粗口嘅，亦都唔覺得講粗口係咩有型或者威風行為，呢次蘇足總罰得啱，亦可警醒球員以後唔好咁多不服判決而爆粗嘅行為。
西布朗剛公布錄得稅前盈利，可謂近年英超聯降班隊中異數。睇番李斯特城、巴拉福特及葉士域治等近年降班例子，都不免出現破產危機。西布朗咁成功，全賴佢哋喺控制球員薪酬上有計，唔會亂簽貴價球員返嚟；相信好大機會喺來季降班嘅列斯、樸茨茅夫等，真係要跟佢哋學吓嘢喇。
英格蘭聯賽盃決賽雖然已經告一段落，但係當日因絆跌米杜士堡前鋒祖比，令保頓輸咗個十二碼嘅巴西後衞科美，就好可能因為咁冇咗份工。佢話保頓重未同佢傾合約，令佢呢個夏天約滿後都唔知身在何方？我求大俠就話呢個世界好現實，第二個犯天條都好可能有同一遭遇㗎。
國際米蘭最近正值多事之秋，雖然截稿前唔知佢哋對索察嘅戰果，但禮拜日大戰羅馬時就有列高巴（圖）同埋史坦高域缺陣，都咪話影響唔大。列高巴喺上場對布雷西亞時向舒奧比動粗，雖然當時逃過球證法眼，最終都被聯賽會翻睇影帶而遭「牢獄之災」。