又試雞毛鴨血，恒指再散277點，兩日計埋冇咗464點。滙控（005）同恒生（011）繼續做火種，期指低水收縮到129點，但滙恒除息大約拖低恒指78點，即係期指實際低水51點，唔算恐怖，唔使過於驚青。
滙控連日大散，啲滙控Put輪自然意氣風發。9212、9279、9314、9590、9664等，升幅由47%至25%。9279與9664成交金額最大，攞嚟分析吓。
9279今年5月到期，輪價24.1仙，溢價10.5%，槓桿率50.8倍，計埋正股股息因素，溢價縮到9%，槓桿率亦大番少少。9664今年8月到期，輪價64仙，溢價10.5%，槓桿率19.1倍，計埋正股股息因素，溢價亦係縮到9%，槓桿率亦係大番少少。
如果睇淡滙控，搵Put輪埋手，冇錯9279爆炸力勁到飛起，但壽命太短，滙控如果跌得唔夠深，9279蝕溢價。要博，應揀9664，溢價大家相同，但用較低槓桿率（19.1倍其實已經好大），換取多3個月壽命，風險比較低啲。話就係咁話，滙控急跌之後，未必會再跌，隨時有反彈，Put輪最好咪搞住。
諗住滙控有技術反彈，博Call輪，正路係9274。食得鹹魚抵得渴，𠵱家炒滙控輪，Call也好，Put也好，要準備飛沙走石，贏輸分分鐘講緊幾十巴仙。
章盛