名人一舉一動，好受市民關注，唔少會跟風，人買乜佢買乜。呢種行為除咗化妝品、靚衫，連百萬住宅都一樣。
講到名人買樓，第一時間諗起，睇怕都係好高調咁四處睇樓、美容界名堂響噹噹嘅蒙妮妲集團主席鄭明明嘞。不論豪宅到中小型，都見佢芳蹤，唔似有啲人好低調唔畀人知。過去半年，就入市五個新盤，大多係豪宅㖭，動用兩億一。
佢重好主動，向傳媒提供入貨資料㖭。睇佢個勢，好似意猶未盡。乜原來搞美容，可以咁好搵！
雖然佢話，有啲係幫親朋好友買，但咁豪氣，又豈是一般用家可以做得到呢？
不過，蘭西覺得，最應該感謝嘅，應該係發展商，因為有名人效應，個盤都好賣啲。
除咗明明姐，近年少喺電視報章見到嘅前女藝人蔣麗萍，早排花咗成兩千萬，買咗八個鴨脷洲深灣軒單位。不過，聞說佢今趟原來係同埋家姐細妹夾份，但就由佢出面。
資深投資者羅家寶，近排密密出手。
日前先以近四千萬，購入旺角亞皆老街舖位，又以一億，掃尖沙嘴明輝中心兩層寫字樓，噚日再用五千七百幾萬，買金鐘遠東金融中心四十三樓○三至○九室。
加加埋埋，短短一個禮拜，用咗近兩億。
至於今次買入嘅遠金單位，約八千四百呎，每呎近六千八，呎價重創新高㖭。部份樓面連租約。
旅遊發展局專程請咗五十個廣州年輕女客，嚟香港參加扮靚主題旅遊，其中一個站，係九倉尖沙嘴海港城「女人萬歲──愛美篇」活動。
海港城為迎接三八婦女節，主辦「女人萬歲──愛美篇」。請嚟本地名髮型師、化妝師、名模陳嘉容，同呢班女客分享扮靚心得，重即場幫佢哋嚟個「大變身」，變成時代女性。
佢哋跟住可以喺商場買番啲至in嘅化妝品同潮流服飾返廣州，喺親友之間威一番。
講到扮靚，其實全世界女士都鍾意㗎啦！
做完內購嘅油麻地窩打老道8號，噚日終於第一次畀新聞界踏足售樓處。窩8一直都賣「都市新貴族」概念，售樓處都襯番個主題。
一般售樓處會擺定枱枱櫈櫈，方便買家同經紀做嘢。今次都唔例外，不過風格就好唔同，一張張四座位嘅長方形枱，整齊排列，有梳化及木櫈座位。
驟眼睇，好似啲西式咖啡茶座，啱晒優皮口味，加埋幽暗嘅燈光，蘭西都未見過氣氛咁浪漫嘅售樓處。
示範單位今日開畀新聞界睇。新地代理總經理周國賢話，禮拜日率先招待新地會，下周公布公開發售詳情，呢個月開賣。之前內購，去咗三百五十間，首八十八名新地會買家，會有數碼相機、電話、掌上電腦等禮物送，總值三十八萬八。
蘭西
電郵地址：
