港股連續兩日大跌，好友收市後頭耷耷、冇厘心機之餘，突然間精神為之一振，原來畀美林打咗支強心針，令佢哋對後市又有番信心。
美林出報告，做港股大好友，睇恒指今年年底會見到16000點，而明年第一季，更會去到18000，記憶所及，呢個係大行最樂觀嘅預測，即係1年之內，恒指有機會大升33.7%。
美林預計，中國喺年底前會重估人民幣滙率，兌美元升值大約10%，呢個幅度，比一般預期為大，所以美林對港股後市亦睇得好好，就以滙控（005）為例，業績宣布後，美林就將滙控目標價由130元提升到140元，雖然滙控跌咗兩日，但以現水平股價計，息率已有4至5厘，有咁高息嘅大藍籌唔多，滙控實在揸得過，短期策略係逢低分段吸納。
港股要升上16000至18000點，唔係話好難，因為地產股亦會助一臂之力。花旗美邦報告就看好樓市前景，樓價已進入上升周期，未來兩至3年可升番上10年前水平（即係負資產問題完全解決），由於樓價同租金上升，地產股盈利預測同目標價亦相應調升。
花旗美邦對3大地產股的評級全部係「買入」，長實（001）目標價提升到92元（未來升幅27.7%）、新地（016）目標價90元（升幅21.2%），以及恒地（012）目標價47元（升幅21.7%）。至於鷹君（041），評級亦為「買入」，目標價則調升到20元（預期升幅55.6%）。由於樓市前景樂觀，相信地產股獲調升評級和目標價，將會陸續有來。
恒指噚日大跌277點，低收13454，20日線（13672）全無支持，且呈裂口式下跌，連續兩日跌得咁兇，就算彈一彈再跌，50日線（13307）亦未必守得住，不過，芬佬就有信心，恒指落到13000至13200，整固一下，又會做番上。3月未平倉合約超過10萬張，個彩池咁大，大戶震一震倉，食番一轉，天公地道。
藍籌打緊仗，國企就繼續上，中國鋁業（2600）、中石化（386）、馬鋼（323）等個勢都好勁，大市即使再挫對國企唔會有大影響，未來個多月，照樣輪流上升。
郭兆誠