國泰為咗慶祝復航北京，組織咗一個訪京團上去，噚日見完陳佐洱、安民，今日就見唐家璇，但係班老細高興四圍威嘅時候，就辛苦班靚靚空姐。
八方噚日去北京中國會，同啲行家等安民同國泰訪京團食晏，個個行家着晒厚羽絨，國泰高層都有大褸護身，但係四位靚空姐竟然只係着住單薄到飛起嘅短裙、絲襪，上身得件短袖上衣加長袖外套，企喺大風到不得了嘅四合院恭恭敬敬守候，當時睇怕只得四、五度低溫，佢哋又唔敢離開崗位太耐，只好隔一陣入去室內用杯熱水暖暖手，真係我見猶憐。
另外，田北俊噚朝同班行家去飲豆漿食早餐兼巡視吓細佬喺王府井間U2嘅業務，點知個店員有眼不識泰山，話唔可以企喺度影相，最後要田少撻朵先掂。八方又聽到有消息話譚惠珠因患乳癌缺席大會，啲人大代表都唔肯多講，只係私底下話送咗花籃畀珠姐。
（圖）國泰主席何禮泰（左）同安民（左二）見到班空姐凍成咁，都全冇護花之心。
傳真︰2623-9278
電郵︰